சப்த ரிஷிகளுள் ஒருவரான அத்திரி மகரிஷி, பொதிகை மலையில் அகத்தியர் தரிசனம் பெற்று, மூலிகை நிறைந்த இப்பச்சை மலையின் அழகில் ஈர்க்கப்பட்டு இங்கேயே பல ஆண்டுகள் தவம் இருந்தார். அத்தவத்தின் பலனாக சிவபெருமானின் காட்சியைப் பெற்று மோட்சம் அடைந்தார்.
கலியுகத்தில் தர்ம சிந்தனை தளர்ந்து கலகங்கள் தலைவிரித்தாடும் நாளில், இப்பச்சை மலையில் “ஸ்ரீ அத்திரீஸ்வரராக” எழுந்தருள்வேன் என்று சிவபெருமான் அருளிய வாக்கின்படி, தாம்பரம் சானட்டோரியம் பச்சை மலை மேல் இவ்வாலயம் எழுப்பப்பட்டு ஸ்ரீ அனுசுயா தேவி சமேத அத்திரீஸ்வரராக நமக்கு அருள் ஆசி வழங்குகிறார்.
சித்தர்களின் தாயான ஸ்ரீ பாலாம்பிகையைத் தேடி சித்தர்கள் வந்து தரிசிப்பதால் இவ்விடம் “சித்தர்கள் வாழும் சிவன் கோயில்” என்றும் அழைக்கப்படுகிறது. மலை உச்சியில் வள்ளலார் ஜோதி, அகத்தியர், ராகு, அத்திரி மகரிஷி, கேது சன்னதிகள் அமைந்துள்ளன — இது ராகு கேது தோஷம் நீக்கும் பரிகார ஸ்தலமாகும்.